Pisuinnarnut aqqutissaq maani sanasunit pitsaasumik suliarineqartoq ingerlalluarpoq
Sanasut maani illoqarfimmeersut pisuinnarnut aqquserniap tallimanik immikkoortortaqartussap, Nuuk kaajallallugu isorartussuseqartussap immikkoortuanik siullermik suliaqartuupput. Suliassaq ilungersunartuuvoq, aammali soqutiginartuulluni. Suliarinerani ilungersunartunik suliassaqartarsimavoq aamma sila qanorluunniit ikkaluaraangat isikkivik alutorineqarluartarluni.
Sanaartornermi ilungersunartut
Illoqarfimmi maani suliffeqarfiup AK Byggeteknikip sanaartugassap immikkoortua siulleq suliaraa. Piffissaq eqqarsaatigalugu malinnaalluarput, aammali ilungersunartunik aqqusaagaqartarsimallutik. Aallaqqaammut pilersaarutigineqartutut sanasut tallimat, sulisartut marluk aamma ilinniartut marluk sulisussatut pilersaarutaasimapput, sulisorineqartulli aalajaatsuusimanngillat, sulisorineqartullu aalajaatsut pilersaarummi pineqartumi sulisimaqalutik. Taamatuttaaq Nuutoqqap Saqqarliillu akornanniittumi eqqakkat aqqutaat sullulik putusimammat peqqinnissaq eqqarsaatigalugu ruujorip suliarineqarnissaata tungaanut sulineq unitsikkallarneqartariaqarsimalluni.
Suliassaq soqutiginartoq
Suliamik ingerlatsileruttortut ilaata Storm Motzfeldt ip oqaluttuaraa, pisuinnaat aqqutissaat taanna tamarmi assaannarmik suliarineqartoq. Sanaartornermi atortussat biilinik sanaartorfiusumut apuunneqarsinnaanngimmata, nammallugit assartorneqartariaqarsimapput. Atortussat aallaqqaammut atorneqartussatut naatsorsuutigineqartut nungussimammata, pilersaarutit naatsorsorneqaqqittariaqarsimapput. Taamaattumik aqqusinissaq silap allanngorarneranut isumannaatsuuniassammat toqqavissat ilaat cementerneqartariaqarsimapput. Suliassaq nuannarisorujussuuara, ullullu tamaasa suliartornissara qilanaarisarlugu, Storm Motzfeldt tulluusimaarluni oqaluttuarpoq.
Nuummut pingaaruteqarluassasoq
Sanaartugassatut pilersaarut tallimanik immikkoortortaqartussaq, Nuup sissaata annersaaniittussaq aamma qatsissumi toqqissumik isikkivigissunik uninngaarfissalik 2020mi pilersinneqareertussatut naatsorsuutigineqarpoq. Pisuinnaat aqqutissat ima silitsigissaaq pisuinnaat, qasujaallisarlutik arpattut kaassuartakkanillu atuisut nuannaarutigalugu atorsinnaassallugu.
Nuuk Ugeavis, 9. Januar 2019, Nr. 2